بيان للشارع .. اطبع و ارمى من فوق العمارات و من فوق الكبارى

شارك فى يوم الغضب و الاضراب … 6 ابريل 2009

يوم الاثنين 6 ابريل 2009 لازم كل الناس يطالبوا بحقهم
طالب بحقك و خليك مصر عليه .. لإن الحكومه لازم معاها الضغوط المسصتمره و اننا نقف مع بعض
لا يسقط حق وراؤه مطالب
يوم 6 ابريل هو يوم الغضب العام
لو انت عامل يبقى فى يوم 6 ابريل توقف المكن و تعلن اضرابك علشان مطالبك المشروعه و لو حتى تعمل اضراب لوقت معين
لو انت موظف يبقى تضرب عن العمل
اعلن عن الاضراب داخل مصنعك أو مؤسستك او شركتك و طالب فى اليوم ده بحقوقك
لو تقدر تجمع الناس و تعملوا اعتصام عند ادارة الشركه .. او ممكن تتجمعوا مع باقى عمال مصر عند الاتحاد العام لنقابات عمال مصر بشارع الجلاء
لو طالب و بتعانى من التعليم السىء و المصاريف العاليه يبقى روح الجامعه و امتنع عن الدراسه و شارك مع زمايلك فى المطالبه بالحقوق الطلابيه اثناء التظاهرات و المسيرات داخل الجامعه … يوم الغضب و الاضراب هايبقى فى كل جامعات مصر
لو انت مهندس و عايز نقابه حقيقيه يبقى اعمل اضراب عن العمل و انضم للاعتصام امام نقابة المهندسين
لو انت طبيب و بتطالب بالكادر شارك فى الوقفه الاحتجاجيه عند نقابة الاطباء
لو انت سواق و بتعانى من اسعار البنزين ماتشتغلش يوم 6 ابريل
لو انت صاحب محل يبقى اقفل محلك فى يوم 6 ابريل
لو انت اى حاجه … شارك بأى صوره تحبها … نظم اضراب عن العمل أو نظم اعتصام صغير امام الاداره او شارك فى التظاهرات المعلن عنها أو امتنع عن شراء اى سلعه يوم 6 ابريل.. و لو خايف من كل ده يبقى خليك فى البيت أو لو هاتنزل يبقى تنزل من البيت و انت لابس اسود
مفيش حاجه بتمنع انك تلبس اسود

أماكن التظاهرات لو تحب تشارك
الساعه 12 عند مبنى اتحاد نقابات عمال مصر بشارع الجلاء
الساعه 3 عند نقابة الصحفيين

و فيه وقفات احتجاجيه امام مقرات الاحياء و مقرات الحزب الوطنى و فى الميادين العامه بكل محافظه

شارك بأى صوره تحبها .. لإن الحل الوحيد لسوء الاوضاع فى مصر اننا نقف مع بعض و نتكاتف ضد الحكومه الفاسده اللى بتدبحنا كلنا
فى الدول المتقدمه بنلاقى هناك الحكومه هى اللى بتخاف من الشعب و بتخاف تاخد اى قرار غلط
فى مصر بنلاقى الشعب هو اللى بيخاف من الحكومه … و ده سبب كل بلاوينا لإننا احنا اللى بنسمحلهم بسرقتنا

شارك فى يوم الغضب … الاثنين 6 ابريل 2009-
http://www.shabab6april.wordpress.com