بقلم. محمد عيد : الثورة المصرية هي الحل لا إيرانية ولا رومانية

بص يا باشا الحل كله فى كلمتين اتنين ده لو عاوزين فعلا حل لكيفية الخروج من هذا المأزق

لو عاوزين فعلاً ان الثورة تبقى مستمرة والشعب كله يلتف حول مرشح الثورة ويسانده

مجلس رئاسى مدنى حمدين الرئيس وابوالفتوح ومحمد مرسى وخالد على نواب

والإخوان تشكل حكومة كاملة

والدستور يبقى بتوافق حقيقى دستور مصرى شعبى يمثل كل اطياف الشعب وكل القوى السياسية

وعدم حل مجلس الشعب

وهيا دى تبقى المشاركة الحقيقية لكل القوى الثورية بجد

شفيق ياخد بالجزمة كمان مرة بعد توحد القوى الثورية اللى اختلفت على مدار سنة ونص بعد تفتيتها وان شاء الله بعدها نشوفه فى طرة مع حبايبه الحلوين وبقية الشلة

هو ده الحل الحقيقى بجد للمشكلة الحقيقية اللى احنا فيها كلنا ولعودة الثورة مرة اخرى ولتمكين الثورة من الحكم بجد بشكل حقيقى وقاطع

ده لو عاوزين فعلاً الحل أما لو مش عاوزين الحل ده او مش عاجبكم فممكن تقولولى موتوا بغيظكم وممكن تقولوا اى كلام وخلاص زى انت بتغنى وبترد على نفسك وانت بتعمل شو اعلامى ومش هنخلص من الكلمات الكتير اللى كلنا حفظناها

كده يبقى فى مشاركة حقيقية لكل القوى الثورية وكل المصريين فى إدارة البلد
وكده كل المصريين هيصدقوا فعلاً صدق جماعة الإخوان فى عدم رغبتهم فى الإستحواذ على كل الكراسى والمناصب وهيصدقوا فعلاً انها مشاركة لا مغالبة

وإثبات فعلاً ان الإخوان يريدون مصلحة مصر قبل مصلحة الجماعة وبدون اى مزايدة على وطنية أحد

وكمان جماعة الإخوان المسلمين خذلت الثورة والثوار كتير اوى فى مرات ومواقف عديدة ومش وقت تصفية حسابات بين شركاء الميدان

وجه الوقت المناسب للعودة للشعب وإعلاء المصلحة العامة لكل المصريين فوق مصلحة الجماعة وتغليبها على اى مصالح شخصية او حزبية

هيقوم واحد إخوانى ناصح دلوقتى مش عاجبه كلامى او مش موافق ان مرسى يبقى نائب فهيقول اشمعنى حمدين يبقى رئيس ومرسى نائب عشان محمد عيد بيحبه وبيرشحه

هقوله لاء يا ناصح لأن حمدين هو فعلاً مرشح الأغلبية العظمى من الشعب المصرى وكمان هيبقى عليه توافق شعبى كبير وبدون اختلاف وتاريخه نضيف وراجل محترم مع احترامى للجميع وبدون ما ندخله فى مقارنات مع اى شخص تانى وهتبقى بالفعل مقارنة خاسرة بكل المقاييس للشخص التانى صح ولا لاء يا عسل ؟

هيقوم الواد الخيبان اللى قاعد ورا خالص فى أخر كرسى زى ما كان طول عمره بيقعد فى المدرسة ومش هيلاقى حاجة خالص يقولها فهيقول ده محمد عيد بيعمل شو إعلامى

هقوله الكلمة الخايبة دى سمعتها منك مرتين عليا قبل كده ومرة على عمرو حمزاوى لما قال مرسى يتنازل لصباحى برضه قولت عليه نفس الكلمة يا فالح هيا حلوة بس ياريت تنساها

هذا هو الحل من وجهة نظرى البسيطة جدا والمحدودة لمصلحة مصر والمصريين وإلا فسوف يأتى لنا شفيق بالثورة الرومانية على طبق من ذهب وأنه جالس على عرش مصر لا محالة

فلا تجعلوا الناس البسطاء الخائفين من الذهاب للثورة الإيرانية أن يختاروا بمحض إرادتهم الثورة الرومانية
فلا تكتبوا بأيديكم سطور نهاية الثورة المصرية وكفاكم عناد ولكن قدموا مصلحة الوطن على المصالح الشخصية واكتبوا سطور جديدة فى بداية الجزء التانى من بداية حكم الثورة المصرية

لعلها تكون بداية التحول التاريخى لهذا البلد ولهذا الشعب وبداية الدولة المصرية بثورة الحرية والكرامة والعدالة الإجتماعية ليس من أجلنا فقط ولكن من أجل أجيال جديدة تتفتح كل يوم مثل الزهور

اللهم انى اردت النصح والنصيحة لبنى قومى من كل قلبى اللم انى قد بلغت اللهم فاشهد

تحيا مصر

Advertisements

2 responses to “بقلم. محمد عيد : الثورة المصرية هي الحل لا إيرانية ولا رومانية”

  1. mohmmedznaty@yahoo.com says :

    كل دا كلام مضبوط لكن كما قلت ان الدستورلابد وان تضعة الفوى السياسية كافة وللاسف ان من بين هذة القوى السياسية احزاب تعمل لصالح مبارك حتى الان ويهمها ان تعطل وضع الدستورلصالح العسكرومنها حزبى التجمع والمصريين الاحرار

  2. osama says :

    اخى الفاضل اولا احبكم جمعيا شباب 6 ابريل واحب ان الفت نظركم ان الثورة المضادة توسعت على مدار سنة ونصف ودارات على انقسام القوى السياسية وانشغالهم بالمنافع الضيقة ثانيا استقطاب نحو العسكرى من مواطن بسيط وقع تحت ازمات فوق طاقتة ولم يجد منقذ بخلافهم ثالثا : ماكينة اعلام جبارة رابعا : استدراج شباب الثورة الغير سياسيين للعنف خامسا : رجال قضاء العهد الفاسد
    اللحظة الفارقة عند تسليم السلطة فالعسكرى نجح فى استخدام عملاء داخل مجلس الشعب واعتقد انهم دخلوا بتفاهمات مع القوىالأسلامية التى تلاشت الصدام لتكلفة العالية وندرك ان هناك فرق بين الحركات الثورية الفردية والحركة من خلال تنظيم قوى فانظرو بكرى متحدث كل عصر كيف يستمت للدفاع عن اعلان دستورى يسلب الشعب ارادتة وانظرو الى بعض القوى العلمانية واللبراية التى هربت خوفا من نار الأسلاميين ظنا فى الجنة الموعودة للعسكرى انظرو الى حمدين الذى حقيقة خدعت فية فوقت الجد طلب منة التوحد ظننا منة انة واحد مننا ولكن ظهر انة واحد منهم االأن التوحد التوحد ومراجعة تغيير نمط الثورة فى التعامل حتى لا تكون صيدا سهلا فى فخ العسر الذين سيبذلون كل طاقتهم ليظلوا فوق البساط

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: