بقلم. عاطف أسماعيل : سلمونتي حبيبي هتفتح الصندوق الأسود إمتى، والنبي والنبي عايز اتفرج

نزلوا شاطر على مرسي على سليمان علشان نفضل في التوهان. قالك شاطر هيعدل البلد ويصلح الاقتصاد بس هييجي عالناس ويبهدل المسيحيين ويظلم الليبراليين وأنتوا عارفين إن دي خنقة ممكن نخلص منها بحاجة واحدة بس. إيه هي؟ نزل سليمان أهو راجل عترة وجامد وهيعرف يشكم الكل، أي نعم هيمنع الكلام ويخنق الجميع بس أه أحسن منبقى باكستان، ينهار أسود باكستان، لا يا عم أنا عايز سليمان. نهاركم إنتو إللي أسود ومنيل بستين نيلة سليمان ده عدو لدود حبيب نتنياهو وباراك وبيريز وأوباما وهيلاري دول حتى بيفكروا ييجوا ينتخبوه صد رد ويروحوا بلادهم تاني.

طيب قوللي نعمل إيه، بص يا سيدي إحنا نسيبنا من الخناقة دي لها لأنها خناقة دولة قديمة وقعت من زمان فيها مبارك فيها إخوان فيها عمر سليمان إللي هيفتح صندوق أسود. يا رب يفتحه عشان نرميهم كلهم في الزبالة ونخلص عنده فضايح على مبارك وطنطاوي والإخوان، محنا عارفين- إنه ماسك عليهم ذلة ومحدش يقدر يتكلم وعارفين إنه هو نفسه صندوق أسود مليان زبالة إشي إسرائيلية وإشي أمريكية وإشي إخوانية وإشي وإشي وإشي. طيب مفروض يختشي على دمه يبقى إزاي ننتخبه يا ناس هنجيب لنفسنا الأذية بالزبالة دي. طب بلاش لما هو من دلوقيت بيهدد الكل إنه لو في قانون صدر يمنع ترشحه هيبيع الكل ويقول على كل المصايب يعني هيبيع اصحابه في السرقة والفساد وخيانة مصر، يبقى أزاي هيبقى علينا إحنا إللي حيالله نلس على باب الله من الشعب.

ده المفروض، بس لا يمكن يحصل أبدًا لأنها تعليمات من فوق من الكبار انزل اضرب عيارين في الهوا الناس تجري من الفرقعة تسخبى في بيوتها لحد منعرف نسلك القرشين ونخلع وراهم وأهو لو ما صابتش وبقيت رئيس يا سليمان أديك معانا وإحنا معاك وتفضل مركبنا سايرة في أمان. طب لو مبقتش، أهو هتغلوش شويه عالدنيا وعاللي بيحصل في الدستور لحد منحطيها تلت أربع خمس ست مواد يحصنونا ويحموا فلوسنا وعرق السنين والمليارات إللى بره لحد منروحلها ونتهنى وهنعزمك، ولا على إيه منت جاي جاي.

ياللا يا مصري روح انتخب سليمان وعيش حياتك بأه، وللا أقولك خليك ساكت لحد متشوف بعينك المخلوع بره مصر هو وولاده وحاشيته ورجالته كلهم ومعهاهم فلوسك وفلوسي والعسكر القدام وراهم في هاواي بيشربوا في صحة مليارات مصر. خليك قاعد ساكت عن الدستور خليك نايم وسيبهم يعملوا فيه إليل هما عيزينه ويحطولك خازوقين تلاتة وتلاقي نفسك بتدخل الحمام بتصريح وتخرج من البيت بإجازة على شرط تكون لابس أفرول الفسحة علشان تنزل

Advertisements

One response to “بقلم. عاطف أسماعيل : سلمونتي حبيبي هتفتح الصندوق الأسود إمتى، والنبي والنبي عايز اتفرج”

  1. Dr.Mohamed Mansour says :

    عيب عليك تتكلم عن فصيل وطني زي الإخوان أو غيرهم بالطريقة دي..
    إنت كده بتسبء لحركة 6 ابريل الثورية المحترمة اللي مش طريقتها التخوين والشتيمة
    أتمنى إنك تمسح مقالك ده وتراجع أسلوبك بعد كده في الكتابة

    للأسف كل واحد بيضغط على الكيبورد دلوقت بأي كلام شتيمة أو غيره بقى بيعتبر نفسه كاتب!!
    بس ليه يتنشر لك في مدونة 6 إبريل؟؟!!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: