المحروسة : مـــش هـيـصـبَّـح


مش هيصبَّح
مش هيقول لي فين الجزمة لا اتأخرت
ولا هكويله قميصه بسرعه لا شِلِّتُه تحت
مش هيبرطم وانا بديله العشرة جنيه
عارفين ليه؟

مش هيصفَّر تحت البيت ويقول لي انا طالع
عايزه بقاله؟
مش هيناكف في الشغاله
مش هيرُوح الدرس يراجع
عارفين ليه؟

مش هيداري سجارة شربها بباكو لبان
ولا هيجيب لاخواته جنان
ولا يتمحلس علشان عايز جينز جديد
ولا عاد هيأخَّر مواعيد
عارفين ليه؟

مش هيخبي شهادته الخايبه
ويمضي بدالي
ولا اقول له العيشه بقت صعبه
يقول وانا مالي
مش هيرد الكلمة بعشرة
بس انا صابرة
عارفين ليه؟

علشان شايله فقلبي حاجاته
كل شقاوته وابتساماته
كل ما اغمض عيني ببوسه
واما بفتّح عيني بشوفه
وسط صحابه ومستنيني
إدعولي لعنده يوديني
كان على عيني فراقك يابني
يا حبة عيني

2 responses to “المحروسة : مـــش هـيـصـبَّـح”

  1. mahmoud says :

    الله يرحمهم

  2. Emad Shawky Fawzy says :

    كان رايح لابس فانلته الحمرا و فرحان
    شايل علم فريقه اللى بيحبه من زمان
    رايح وراه فى كل مكان
    بيهتف من قلبه اللى بحب الحياة مليان
    و بيقول لاصحابه حنشجع فريقنا مهما كان
    وراحوا و شجعوا بس مرجعوش زى زمان
    فرجتهم اتكسرت و اختفت بين دموع و دماء زى البركان
    بيجروا هنا و هناك و كأنهم فيران فى مصيدة كل جبان
    حيروحوا فين ويجروا منين مخلاص اتكاتورا عليهم و قفلوا عليهم المكان
    يالا دبح … يالا اقتل … يالا صيب … يالا ورانا شغل كمان و كمان
    طبعا ده كلام السفلة المجرمين فى كل زمان و مكان
    و بدل مايرجع الولاد بيجروا من الفرحة الجنان
    رجعوا على ضهورهم و شفنا الجسم بقى همدان
    و بقا لينا اننا ندعيلهم ان ربنا يتقبلهم فى رحمته و يدخلهم الجنان .

    ياااااااااااااااااااااااااااااارب ارحمهم ….. يارب اغفر ليهم …… يارب صبر اهاليهم .

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: