بقلم. نوارة نجم : أيوه بنهتف ضد العسكر

يسقط يسقط حكم الأهطل..

المجلس العسكرى الفاشل، الذى فشل فى كل شىء… يا فاشل يا فاشل.. يا فاشل يا فاشل يا فاشل يا فاشل. فشل فى إدارة شؤون البلاد، وفشل فى الاحتفاظ بصورة مشرفة عشنا على ذكراها فى نصر أكتوبر، وفشل فى الاحتفاظ بحب فى قلوب غرر بها فيلم أبناء الصمت، وفشل فى إيجاد أجوبة عن أسئلة غاية فى المنطقية، بل فشل حتى فى محاربة أعدائه… وأخيرااااا… آن آن آآآآآن،، عارفين الولية البلدى اللى بتسلط على ضرتها عيال صغيرة عشان خايفة تتخانق معاها لجوزها يضربها؟

معركة المجلس العسكرى الآن مع النساء، يحاول المساس بكرامة البطلة سميرة إبراهيم، ويسحل الدكتورة غادة كمال، ويهتك ستر فتاة هى أشرف وأطهر وأنقى منهم جميعا بضباطهم وعساكرهم وكتائبهم، ثم يسلط على الفقيرة مجموعة من الرعاع الحثالة الذين لا يجدون ما يفعلونه معها إلا الضرب الحريمى.. حتى مش مسترجلين بما يكفى أن يرسلوا إلى قناصا. يقول الدكتور تميم البرغوثى، الأستاذ فى العلاقات الدولية، إن الثورة تمكنت من شل حركة النظام الاستبدادى، وأن مهمة المجلس العسكرى هى استعادة القوة الاستبدادية من خلال ممارسة العنف لإحكام السيطرة على المواطنين عبر إرهابهم وزرع الخوف فى نفوسهم، وأن العودة لممارسة العنف بدأت بالتدريج، كمن أصيب فى حادث شل ذراعه، فعمد الطبيب إلى تدريبه على حمل أشياء خفيفة ثم الأثقل فالأثقل. طيب بس مش كده… مش بالتبول على الناس، والكشف على عذرية الفتيات، وشد الشعر، والقرص، والعض، واستخدام بهلوانات مثل عكاشة وسبايدر وحياة، وتأجير بلطجية ببيجامات.. إيه؟ المجلس العسكرى ناقص يقف لنا تحت الشباك ويزغرد وهو بيصقف بالقبقاب. بلدى قوى يا حسين.

ما حدث مع الفقيرة إلى الله كالآتى: تم سرقة كل حساباتى على الشبكة الإلكترونية، فساعدنى الأصدقاء على استعادة بعضها، أو أهمها، ألا وهى المدونة، وحسابى على موقع التويتر، ثم استدعيت للتحقيق معى فى محل عملى، حيث إننى أعمل محرر مترجم بقناة المعلومات المرئية بالتليفزيون المصرى، ثم استدعيت للتحقيق معى فى بلاغ قدمه كائن هلامى احترف شهادة الزور اسمه عبعزيز فهمى عبعزيز، ثم بدأت حملة هجوم منظمة -اعتدت عليها- ضدى، وأخيرا، تجمهر ما يقرب من 25 ذكرا أمام محل عملى الكائن بماسبيرو لضربى، حيث تقدم شخص ببيجامة وقال: نوارة نجم الخاينة العميلة…. أم 6 أبريل، وتكأكأ الخمسة وعشرون ذكرا حولى لضربى (حلوة تكأكأ دى؟ قلت أكتبها عشان ألخبط المجلس العسكرى ويقعد فى حالة انعقاد دائم لبحث معنى كلمة تكأكأ)، وكان ذلك بعد أن عبرت الشارع لإيقاف تاكسى، تدخل شخصان للذود عنى وقالا: إجرى يا نوارة.. فأجبت بمنتهى الBلاطة: أنا ما باجريش.. لو سمحت وقف لى تاكسى… تاكسى مييييين… يا ستى إجرى إحنا بننضرب معاكى… ما باجريييش.. ثم قامت مجموعة الحثالة بسحبى أنا ومن يذودان عنى ليعبروا بى الشارع مثل ما فعل الرعاع بهيباتيا (خليك بقى فى انعقاد دائم تسأل على هيباتيا دى مين)، كل ذلك على مرأى ومسمع من قوات الجيش المكثفة التى تحمى مبنى ماسبيرو، إلى جانب أمن التليفزيون، وقوات الشرطة التى وقف أحد ضباطها يعطى توجيهات للحثالة التى تجمعت حولى، حتى أوقف مهند وحسن (عابرا السبيل اللذان تدخلا لحمايتى) سيارة ملاكى اتضح أنها مملوكة للأستاذ لطفى عبد الفتاح مدير عام البرامج الثقافية بقناة القاهرة 3.

بعدها بهنيهة (ههههههه وربنا لاخليكم تكلموا نفسكم… خليك فى انعقاد دائم، يعنى إيه هنيهة يابو خمسين فى المية؟)، كتبت المذيعة هالة فهمى على صفحتها بالفيسبوك أن الذين تجمهروا لضربى هم عساكر جيش رأتهم بعينيها وهم ينزلون من إحدى الحافلات فى جراج التليفزيون ويرتدون ملابس مدنية، وحين شاهدها العساكر وهى تصورهم استدعوا أحد الضباط الذى كان سيعتدى عليها لولا أنها احتمت بسيارتها… طبعا وإنتو وراكم غير الحريم تضربوهم؟ بس مين فهمكم إننا لا مؤاغزة حريم؟ لو إنتو رجالة يبقى إحنا حريم. طيب… أولا، أتوجه بخالص الشكر والعرفان لقادة المجلس الأعلى للقوات المسلحة الذين قدروا قوتى بخمسة وعشرين عسكرى جيش…. دول صدقوا إنى زينة صديقة هيركليز بجد، ثانيا: لا هدف لكل ذلك إلا تخويفى… طب أنا ما باخافش أعمل إيه طاه؟ ما باخافش.. وربنا ما باخاف.. الأوبشن ده مش نازل فى النسخة بتاعتى، وشاغلين نفسكم وشاغلينى -وأنا واحدة مش فاضية وورايا ثورة- بمحاولة تخويفى.. طب أعمل إيه؟ أعمل نفسى خايفة عشان تسيبونى أشوف اللى ورايا؟

طيب.. ياما… حلو كده؟

Advertisements

4 responses to “بقلم. نوارة نجم : أيوه بنهتف ضد العسكر”

  1. وسيم محمد عبد المطلب says :

    انا عايز اعرف حقيه 6 ايريل بجد اصلا انا عندي فيديو فيه الدكتوره الي انتي بتقولي عليها المسحوله دي وهي بتشرب سجاير دي الدكتوره والاخت التانيه الي في كشف العزريه قاعده معاهم مع الامريكان دا يعتبر دا تخطيط لهدم البلاد والاحتكاك بالجيش والتانيه في كشف العزريه عارفه ياستاذه نجم بالله لو الاقي مفهوم واضح ل6ابريل انا منقضم ليكم طبعا هتقولي مش هتقلل ولا تزود حاجه في الحركه بس كل واحد ناوي ينضم للحركه هبرفض انا من الزقازيق وكل ماروح انضم ارفض لما الاقي حد يوضحلي دا بس وشكرا يا نواره

  2. mansourmaserhussam says :

    الثورة مستمرةمن اجل القضاء على عصابة مبارك وتطهير مصر من المفسدين
    الثوة مستمرة من اجل الحرية والكرامة والعدالة الاجتماعية
    الثورة مستمرة من اجل القصاص لشهدائنا الذين ضحوا بارواحهم الطاهرة من اجلنا
    الثورة مستمرة لانه لم يتحقق اى هدف من اهدافها النبيله
    الثورة مستمرة لان مبارك القاتل السفاح فى فندق عشر نجوم
    الثورة مستمرة لان عصابة مبارك فى سجن طرة بشوات
    الثورة مستمرة لانه يتم سحل الثوار و تقيدهم بالكلبشات فى سراير المستشفيات
    الثورة مستمرة لان نظام مبارك بأكمله هو الذى يحكم مصر الان
    الثورة مستمرة لانه يجرى تقسيم التورتة الان
    الثورة مستمرة لانى مريض وهاموت لانى مش قادر اجيب العلاج
    الثورة مستمرة من اجل مستقبل افضل لابنى وابنك
    الثورة مستمرة لاننى مش لاقى اكل وساموت من الجوع
    الثورة مستمرة لاننى مازلت لااجد رغيف الخبز ولا انبوبة البوتجاز
    الثورة مستمرة لانى موظف راتبى سبعمائة جنية ويوجد موظف بنفس مؤهلى بياخد7000
    الثورة مستمرة لاننا لانستطيع ان نقضى مصالحنا الا بالرشوة والوساطة والمحسوبية
    الثورة مستمرة لاننا نشرب مياة المجارى ونأكل الاكل الملوث والمسرطن حتى الان
    الثورة مستمرة لان الاعلام هو اعلام مبارك
    الثورة مستمرة لاننا لم نقتص للشهداء الذين ضحوا بارواحهم من اجلنا ومن اجل مصر الحبيبة
    الثورة مستمرة لاننى لا استطيع دفع الدروس الخصوصية لاولادى
    الثورة مستمرة لاننى مازلت با نضرب على قفايا فى اقسام الشرطة
    الثورة مستمرة لان ابنى وابنك مستحيل ان يلتحق بالقضاء او بالشرطة لان ابوه غلبان
    الثورة مستمرة لاننى ما عنديش ادفع لابنى رشوة من اجل الحصول على وظيفة
    الثورة مستمرة لاننى واولادى ننام فى حجرة واحدة ليس لها منفذ فننام فيها كالاموات
    الثورة مستمرة لان الحرامية هم البشوات
    الثورة مستمرة لان قضاءنا المصرى دائما على الغلبان
    الثورة مستمرة لان جزمتى اتخرمت وتدخل فيها مياه الامطار ومش عارف اشترى غيرها
    الثورة مستمرة لان اولادى لايأكلوا اللحمة طوال العام ولاحتى فى الاعياد
    الثورة مستمرة لاننى اعمل ليل نهار وينام اولادى كثيرا جوعا
    الثورة مستمرة لان ابنى يذهب للمدرسة من غير فطار
    الثورة مستمرة لاننى اتهان على فرن العيش وفى طابور الانابيب
    الثورة مستمرة لان مفتش التموين له راتب من صاحب فرن العيش
    الثورة مستمرة لان فيه موظفين مؤقتين غلابه يحصلون على الفتات وهيموتو من الجوع
    الثورة مستمرة لان ابنى مالوش ذنب فى ان الدولة اكلت حق ابوه
    الثورة مستمرة لان المسئولون يكذبون علينا بصفة دائمة وما اتغيروش
    الثورة مستمرة لان الغلابة كالاموات ما ليهمش اى حق فى هذه البلد
    الثورة مستمرة لان بلدى تستعد الان لعهد مبارك جديد
    الثورة مستمرة لان فيه اسياد وعبيد
    الثورة مستمرة لانى نفسى اكون انسان
    الثورة مستمرة لان كرامتى دائما ما تمتهن واذل داخل المصالح الحكومية لاننى غلبان
    الثورة مستمرة لاننا نعشق تراب مصر ولن نفرط فيها ابدا ولو كانت الشهادة هى السبيل

  3. إسماعيل الروبى says :

    يا أستاذة نوارة : ما تخافيش من شوية الحثالة دول …………أوعى تهزك الحركات القرعة اللى بيعملوها دى ……ف المجلس العسكرى و شوية البلطجية بتوعه وعلى رأسهم توفيق عكاشة و سبايدر وحياة كل دول مش لاقيين حاجه يعملوها ف بيبلطجوا عليكى ………….بس ما تخافيش لأنهم عاملين زى الدبيحه اللى بتفرفر قبل ما تموت ف بلاش تحرميهم من الفرفره ………..ان شاء الله ثورة 25/1/2012 هتنجح و هتحقق أملنا اللى بنتمناه .

  4. خالد السنديوني says :

    الفيصل بيننا وبين قادة جيوشنا البواسل هو 30 يونيو لماذا لانستطيع أن ننتظر حتى هذا التاريخ

    أما شهداء محمد محمود فأنا معرفش ايه اللي جاب الثوار عند محمد محمود وأما الاخ عبودي بتاع الكورة فدي حاجة تموت من الضحك يعني انت رايح تجر شكل الجيش وتولعها والله أعلم مين المتربص سهل جدا يكون فيه قناص هنا أو هناك وإلا صعبه دي ممكن يكونوا اتدربوا في امريكا زي مالجماعة راحوا اتدربوا في امريكا عند حبايبنا اللي خايفين على مصر أكثر مننا
    وحتى هذه اللحظة لم يدخل الجنزوي مجلس الوزراء في أي بلد يحدث هذا

    اعطوا الجيش فرصة حتى 30 ستة لو مسلمش السلطة – وبالفعل سلم السلطة التشريعية – وانتوا عارفين كده كويس- انا حانزل معاكوا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: