علا شهبا تكتب : كل الى محتاجين تعرفوه عن المدعو دومه

هتسالوا مين دومه الى اتقبض عليه ده و عملين دوشه ليه, مهو الى جابه لنفسه 

هيسمعوكوا المداخله الى عملها على الهوا و هيرصوا قائمه اتهاماته المرتبه بعنايه و يكلموكوا عن شروره الممنهجه 

ماشى ,خالونى اسمعكم عنه و عن تهوره اكتر 

دومه الزميل الى بختلف مع منطقه و استراتيجيته و تكتيكه وباتفق مع مئه زميل و زميله على الاقل قبله 

الزملا الى بالفعل ماترددوش لحظه فى انهم يقفوا معاه

اغلبهم ماسعفنيش الحظ اجرب اواجه الموت مع احدهم قد مجربته جنبه 

دومه المتهور نعم ..ايوه المتهور ,مثلا تخيل انه بجوانتى عبيط ممكن يصطاد القنابل يوم 28 يناير 2011 على كوبرى قصر النيل علشان يخفف عنكم وقعها ,وحتى لما ايده اتحرقت و لم يفلح معها مرهم الحروق الى دهنتهوله اكتر من مره و انا بترجاه يعمل حاجه تانيه و يبطل يحاول يستكمل مهمه الصيد,ساعتها وهو بيقلع الجوانتى لانه اصبح بلا فائده وبيدور على حاجه غيره يوهمنا انها هتحمى ايده وقعت بينا قنبله ,عادى.. مئات القنابل وقعت قدامنا يوميها لكن دومه المتهور وطى بايده العريانه ولقطها و جرى ييها علشان انا و الى حواليا قدام ميتعبوش اكتر …متهور مش كده 

بعدها كمل بردو , سحب الشال الى كنت لبيساه ,لفه على ايده الملتهبه وكمل 

ناله نصيب من الرصاص و لم يتوقف , لم يتوقف الا بعد ساعات لما الرصاص طال وتر بقدمه فحملوه الناس مجبر ليعالج 

دومه زميلى الى مبيرضاش يسمع لصوت العقل والى هيقوللكم عنه انه مخرب فى وصت كل هذا العنف فى الصف الاول على كوبرى قصر النيل فى لحظه كنت انا و هو و شخص اخر لم نكن نعرفه وقتها ..ولم نعرفه شخصيا بعدها لانه مات 

كان حنين كفايه انه يحاول يرد على سؤالى الغبى : هو ممدد كده ليه يا أحمد , مات ؟  بانه يوقلى :لاء لاء متقلقيش مصاب بس ,الراجل الشهيد البطل كان مستلقى تماما و فى جبينه بقعه حمراء صغيره ,رصاصه فى راسه كانت كفيله بقتله 

مع ان انا و هو و هذا الشهيد كنا لوحدنا لدقائق طويله فى صف مواجه تماما للامن لكن اتا منتبهتش مات ازاى و امتى مع انى مكنتش عارفه اجيد فن الصيد مثله ومشغلتنيش القنابل قده, لم انتيه الا و هو ممدد تماما ,دومه بقى الشرير عينه كانت عليه شافه بياخد خطوه لقدام و بيرفع ايده لفوق و بيقول 

للعساكر : انا بس عايز ادخل التخرير انا مش عايز اؤذيكم ,لكن الخطوه دى جعلته يستحق رصاصه قاتله فى جبينه ,متهور ,اه هذا الشهيد كان فى الاغلب متهور زى دومه 

الى اشغل نفسه بالتخفبف عنى و شغل نفسه كمان بالخناق مع كل شخص بيعطلنى وبيطلب منى ارجع ورا علشان انا واحده ست 

دومه, 

ممكن تسالوا عنه د.منى و اخرين ,ازاى دوشهم فى هشام مبارك علشان مصر ينزل يدور علينا و هو مصاب فكان لازم يطلبوا مننا اننا نروح له هناك علشان يهداء و يكمل علاجه 

الىى معرفش كمل امتى بس اعرف انه كان جنبنا تانى رغم الاصابه يوقت قليل و اعرف انه كان متهور كفايه انه يفضل مصر وهو بيعرج بيتنقل مابين المداخل المختلفه للتحرير وهو بيهاجم علشان يساهم فى الحفاظ عليه و حمايته 

و حمايه المتحف و المجمع و الحلم و الثوره و كل الحاجات الى لها معنى او ملهاش بس شئتم ام ابيتم بتجمعكم بيه

ده دومه الى بيقول عليه خالد السيد انه مشفش حد بيتكيف مع المعتقل قده 

فلو فاكرين انه السجن هيهده  نأكدلكم ان السجن و السجان عجزوا عن ده مرات كتير قبل كده و لشهور طويله 

دومه صدق بعد التنحى اننا انتصرنا لدرجه انه كان مهموم يفكر هيدخل فلسطين ازاى ,علشان هناك معركته القادمه لتحريرها🙂 ,معرفتش اناقشه يوميها لان الواقع كان هيعرفه اسرع منى و يقنعه ان المعركه هنا لم تنتهى و انه هو نفسه هيصاب و يعتقل تانى علشان تحرير مصر يكمل ,وقد كان

لما يخرج ناقشوه. يمكن يحالفكم الحظ اكتر,ناقشوه فى كل ما تختلفوا معه فيه ,لكن الاكيد انه لازم يخرج لازم يكون حر و لازم حريته تكون هم و مهمه زى م تحريرنا هم و مهمه بالنسباله و بالنسبه لنا و بالنسبه لكم 

دمتم بهمه و دومه حر

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: