محمد الشهاوي يكتب: 25 يناير والمؤامرة الشيطانية

عنوان يخض مش كده بس مش غريب ماهو دا اللي بنسمعه دلوقتي من بعد مابدأت دعوات النزول للتظاهر السلمي يوم 25 يناير، “مؤامرة .. اسقاط الدولة .. تدمير الجيش .. تقسيم مصر …..” طبعا اي حد يسمع الكلمتين دول رد فعله الطبيعي “يانهار اسود .. العيال دي لازم نولع فيهم بجاز” ودا بالظبط اللي عايزه الاخوة بتوع الاعلام المحايد الشريف واللي وراهم

المشكلة ان الناس اللي نازلة دي لا نازلة تولع ولاتخرب ولا تقسم ولا يحزنون الناس دي نازلة تتظاهر سلميا وقالوها وكرروها بدل المرة عشرة “ثورتنا هتفضل سلمية”، الناس دي ليها مطلب واحد وبس وهو ان المجلس العسكري الموقر يتفضل مشكورا بتسليم البلد لمجلس الشعب اللي هو السلطة المدنية اللي انتخبها الشعب ياتري صعبة دي؟!

هتقولولي طب مستعجلين علي ايه ماخلاص بقي في مجلس شعب وكلها كام شهر ويبقي في رئيس زي ماالناس وعدت، هقولكوا لو نرجع بالذاكرة كده كام سنة ورا لحد مثلا يوليو 52 ياتري فاكرين بعد الثورة مانجحت مجلس قيادة الثورة “العسكري” قال ايه، قال احنا عايزين نسلم ادارة البلد لسلطة مدنية ونرجع لمكانا الطبيعي بس طبعا مع شوية فوضي مفتعلة وأحداث ترويعية قالوا لأ الناس لسه مش مستعدة للديمقراطية “الديمقراطية خطر” ومع الخوف والذعر اللي فيه الناس من انهيار البلد طبعا بصموا بالعشرة لمجلس قيادة الثورة عشان يكمل ياتري دا مش بيفكرنا بحاجة كده؟!!

بلاااااها تشبيهات ومقارنات ناس هتقول عليها دا وهم وخيال .. تعالوا نخدها كده مع بعض واحدة واحدة من ارض الواقع بقي:
المجلس قال هنسلم البلد بعد 6 شهور وادينا كملنا سنة ولسه مكملين لحد امتي الله اعلم!!
المجلس قال جاتلهم اوامر ايام الثورة بمساواة ميدان التحرير بالأرض ورفضوا .. طيب تمام .. راح فين بقي الكلام دا في شهادة المشير واللا دا كان تهيؤات؟!!
المجلس بيقول هو اللي حمي الثورة طيب حماها فين تحديدا في موقعة الجمل واللا ماسبيرو واللا محمد محمود حد يقولي؟!!
المجلس ورط الجيش في مواجهات مع شعبه في اكتر من حدث وخلق احتقان بين الجيش وشعبه، واللي يفقع اكتر ان بعد كل حدث وبعد الضرب والسحل والاهانة يقولوا محصلش .. طب ايه يعني فوتوشوب مثلا؟!!
المجلس شوه صورة القوي السياسية وصور الثوار علي انهم بلطجية ومخربين وممولين ولازم يتحطوا في “افران هتلر” وزي ماتحب تقول قول!
المجلس مركز مع النشطاء والرموز السياسية ومروقهم محاكمات عسكرية وسايب الاخوة البلطجية اللي بجد بقي نازلين نهب وتخريب و تثبيت في الناس ولا كأنها عزبة أبوهم!
المجلس قال مجلس الشعب الجاي مش بيمثل الشعب المصري امال مين بقي اللي بيمثله؟!!
المجلس عايز يتدخل في صياغة الدستور الجاي عشان يضمن لنفسه وضع معين!
المجلس فشل في حل الأزمة الاقتصادية وانه يحط حلول لمشاكل الناس لان هو اصلا مالوش غير في العمليات العسكرية والتخطيط الحربي!

ياتري عندكوا استعداد تفتحوا عينيكوا شوية عشان تشوفوا الحقيقة اللي لازم تشوفوها مش الوهم اللي المجلس واعلامه عايزكم تشوفوه علي انه هو الحقيقة؟َ!
الناس اللي نازلة دي لا نازلة تخرب ولاتحرق ولاتدمر الناس دي نازلة بتقول “سلمية سلمية”
الناس دي عايزة المجلس يسلم السلطة لمجلس الشعب المنتخب ويرجع بقي الجيش لثكناته و مهمته الأساسية في حماية مصر وحدودها، ومجلس الشعب يدعو لإنتخابات رئاسية خلال 60 يوم ونقدر بقي ننتخب رئيس لأن البلد مش هتستحمل شهور دا لو كانت شهور فعلا و مينفعش تقعد من غير رئيس اكتر من كده واعتقد دا اللي كلنا عايزينه
هل الكلام دا بقي صعب و مشكلة و”مؤامرة”؟؟

حكموا عقولكوا ياناس وماتعوموش علي عوم ناس بتضللكوا زي ماكان بيحصل زمان وفكروا كويس قبل ماتصدروا احكامكوا وتقولوا اي حاجة .. فتحوا عينيكوا و حكموا عقولكوا أثابكم الله ….

 

2 responses to “محمد الشهاوي يكتب: 25 يناير والمؤامرة الشيطانية”

  1. ناصر عبد الوهاب says :

    انا ابريلى وافتخر

  2. sara says :

    هي دي الحقيقه بجد وربنا يقوينا وينصرنا ويحقق امالنا اللهم امين يا رب العالمين

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: