هـالــه قـنـديـــل تكتب : ” ثـورجـى وكـنـبــاوى “

_خرج ثورجى كعادته فى صباح كل يوم للوقوف فى طابور العيش بالساعات أملا فى الحصول على بجنيه واحد عيش وهو ما يعد فى بعض الاحيان من المستحيل تحقيقه ، ولكنه كان يوما ليس ككل الأيام
_ وصل ثورجى لفرن العيش وصدم من طول الطابور ولكنه وقف فى آخره التزاما بدوره وفى لحظات قليله وقف بعده العشرات من الأشخاص
-أخد يتحدث الى نفسه قائلا : حسبى الله ونعم الوكيل ، بقى احنا عملنا ثوره مات علشانها شبابنا اللى زى الورد ،ده غير اللى جاتله عاهه ضيعت مستقبله ،علشان نقف الوقفه دى تانى ،حسبى الله ونعم الوكيل فى المجلس العسكرى
“فى هذه الاثناء كان يقف أمامه <الاستاذ كنباوى > انسان غير مبالى بأى شىء،سلبى جدا ، لاتفرق معه مثل هذه الأمور فهو يريد <<الاستقرار وعجلة الانتاج تمشى >> كتفكير أغلب المصريين حتى اذا كانت على حساب كرامته
– التفت كنباوى الى ثورجى ليرد عليه
كنباوى : مالك ياعم ماتهدى علينا شويه، هوا احنا خدنا ايه يعنى من الثوره غير وقفة الحال والخراب والعطله ده غير الاقتصاد اللى انهار
” استشاط ثورجى غضبا لكن سرعان ما تمالك نفسه ”
ثورجى : ايه اللى انت بتقوله ده،ده على اساس ان قبل الثوره كان حال البلد حلو قوى وزى الفل ، ماهى طول عمرها واقفه وخربانه واقتصادها زى الزفت و..
-قاطعه كنباوى : بس اهى كانت ماشيه وخلاص
ثورجى : بقولك ايه ، انت ايه رأيك فى ثورة 25 يناير ؟
كنباوى :ياسيدى انا مش بقولك ان الثوره وحشه لاسمح الله ،بس خلاص بقى بلاش نزودها ونسوق فيها،قولتوا عايزين مبارك يمشى واهوه مشى ، عايزين ايه تانى؟
-ثورجى : مين اللى قال ان هدفنا ان مبارك يمشى،احنا قولنا كل النظام يسقط يعنى مبارك وكل اعوانه والنظام كله،هيفيد بايه ان مبارك يمشى ونفس النظام الفاسد
لسه بيحكمنا ،وبعدين بقالنا سنه فى محاكمات وتأجيل فى تأجيل وهيا أصلا
تمثيليه ،عشان كده لازم نكمل ثورتنا لحد النظام كله مايسقط والسلطه تتسلم للشعب
-كنباوى: يا عم حرام بقى كده ، والله البلد هتقع وهتخرب وساعتها هنندم
“” كل هذا الحديث ولازال الطابور كما هو لم يتحرك خطوه “”
-كنباوى: شوف ياسيدى انتوا عملتوا ثوره وشيلتوا مبارك،والمجلس قال هيسلم فى يونيو،يبقى نصبر بقى مش كل حاجه نقول ثوره وهننزل ،احنا كده هنوقف البلد
هنخسر ايه يعنى لو صبرنا شويه
– ثورجى:هنخسر كتير ،طيب ماهو قال 6 شهور وهيسلم وما سلمش،يبقى ازاى نصدقه تانى
وبعدين تقدر تقولى فى خلال السنه دى عمل ايه
ماشوفناش غير انتهاكات ومحاكمات عسكريه للثوار والمدنيين،انت شوفت احداث ماسبيرو
وبعدها محمد محمود واخيرا احداث مجلس الوزراء والقصر العينى ….شكلك مش متابع؟
كنباوى:لا عارف كل ده،بس الشباب هما اللى عصبوهم وضربوهم بالطوب
“كاد ثورجى ان يفلت اعصابه”
ثورجى:عصبوهم فى ايه؟ وحتى لو عصبوهم هو ده معناه انهم يضربوهم بالرصاص،ويسحلوا البنت ويضربوها ويعروها بالشكل اللى شوفناه ده،و..
-قاطعه كنباوى مرة أخرى:والنبى بلاش موضوع البنت ده، اهوه ده بالذات بيعصبنى،انا شايف انها ليه تنزل اصلا، الرجاله ماخلصوش يعنى
ثورجى: نزلت عشان انت قاعد فى البيت ومانزلتش
-رد كنباوى وهو فى غاية الغضب: تقصد ايه حضرتك؟ وبعدين انزل ما انزلش دى حاجه تخصنى انا حر ، مش دى الديموقراطيه اللى انتوا بتنادوا بيها برضه يا باشمهندس
-ثورجى: طبعا دى حريه شخصيه، بس ياريت تقول الكلام ده لنفسك، انت من شويه قولت ايه اللى نزلها واتعصبت قوى، فين بقى الديموقراطيه فى كلامك،هيا كمان حره
ياريت لو حضرتك مانزلتش ماتتكلمش بقى على اللى بينزلوا وتقولوا عليهم عملاء ومخربين
هيا دى الديموقراطيه ياسيدى
كنباوى: بقولك ايه يا عم،انت هتوجع دماغى ليه،انا جاى اجيب رغيفين عيش واروح،وشكلى كده مش هعرف اجيبهم فى اليوم الاسود ده
ثورجى: اهوه ده بقى سبب رئيسى يخلينا لازم نكمل ثورتنا، لاننا لما نزلنا فى 25 يناير اللى فات كان هتافنا الرئيسى<< عيش..حريه..عداله اجتماعيه>> وده كان هدفنا ان كل مصرى يعيش حياه كريمه وكرامته تكون محفوظه،تقدر تقولى فين بقى الكلام ده،عشان كده لازم نكمل لحد ما تتحقق مطالبنا ونعيش بنى آدمين بكرامه مش نقف طوابير بالساعه عشان نجيب بجنيه عيش اللى هوا المفروض انه ابسط حقوقنا
-كنباوى: خلاص ياسيدى، انزلوا بقى واخربوها خالص،وساعتها مش هنلاقى اللقمه اصلا،،ووقتها هنتمنى طابور زى ده
-ثورجى: ازاى تتمنى حاجه من حقك،دى حقوقك ولازم تطالب بيها وما تبقاش سلبى
-كنباوى:انتوا مجانين هوا انتوا فاكرين ان العسكر هيسلموها،اهوه ده بقى الحلم بعينه
فخلاص بقى ليه تنزلوا وشباب تانى يموت عشان شىء مستحيل يحصل
-ثورجى: اهوه انت دلوقتى بتعارض نفسك، من شويه قولت نصبر لشهر 6 لحد مايسلمها
ودلوقتى بتقول مش هيسلمها وده حلم
عشان كده هنعمل الصح وخلاص وبرضه هننزل ،، وياسيدى لما نموت بكرامتنا احسن مانعيش عبيد تانى، وغصب عنه هيسلمها
كنباوى:أما نشــــــــــــــــــوف
“وقف الاثنان فى لحظة صمت وظلا ينظران الى أول الطابور والى آخره،وعلى وجه كل منهما احساس باليأس من الوصول للهدف وهو الحصول على بجنيه عيش”
ثورجى: تفتكر هنقدر نوصل للى هناك ده “ويشير بيده على أول شخص فى الطابور”
كنباوى: يارب بقى،انا رجلى ورمت
ثورجى: ماقولتليش صحيح،ناوى تعمل ايه فى 25 يناير اللى جاى
كنباوى: هاخد ولادى وانزل احتفل معاهم فى الميدان بالثوره،دول بيقولوا هيوزعوا هدايا،واهى فرصه نخرج من الجو الكئيب ده شويه
“صدم ثورجى من كلام كنباوى وقال بنبرة يملؤها الغضب الشديد”
ثورجى: انت بتقول ايه؟ هيا فين الثوره دى اللى عايز تحتفل بيها؟ بعد كل اللى قولتهولك ده لسه بتفكر بنفس الطريقه، هتبيع دم الشهداء عشان شوية هدايا،ياراجل اتقى الله
كنباوى: ايه ياعم الكلام الكبير ده؟ ابيع ايه بس؟ انا عايز البلد تستقر ونرجع نفرح تانى بقى،احنا تعبانين
ثورجى: تفرج ازاى وفى ناس ماتت وحقها لسه مارجعش،بقى انت تحتفل واهل الشهداء قلبهم محروق على أولادهم اللى حقهم ضاع
“صمت كنباوى ولم يرد ونظر الى الجهه الاخرى محاولا الهروب من الاجابه”
ثورجى: ماردتش يعنى ،ولا مش لاقى كلام تقوله
كنباوى: بقولك ايه انا مالى ومال السياسه اصلا، دول ماكانوش شويه عيش اللى هيصدعونا
وبعدين مش هيا دى الديموقراطيه،انا من حقى اعمل اللى انا عايزه،وانت كمان حر اعمل اللى انت عايزه،، وسيادتك بقى هتعمل ايه فى 25 يناير؟
ثورجى: نازل اكمل الثوره طبعا لحد ما اجيب حق اخواتى ، ويا تسليم السلطه للشعب والمجلس العسكرى يتحاكم يا نموت بكرمتنا
كنباوى: يبقى هتموت

“وفجأه ارتفع صوت بعض الاشخاص فى الطابور قائلا:ماترحمونا بقى، الله يخرب بيت ده وقف حال ..ساعتين واقف عشان اجيب عيش ،مش عايزه خلاص اشبعوا بيه وخرج من الطابور وغادر المكان
وفجأه صاح الجميع:الله يخرب بيت الثوره واللى عملوها “خربوا البلد” وبدأوا فى مغادرة المكان واحدا تلو الاخر
وهنا التفت كنباوى الى ثورجى قائلا: شوفت ياسيدى الثوره عملت ايه ،صدقت كلامى
وبلاها العيش خالص “وغادر المكان ايضا”
“صدم ثورجى مما رآه واندهش من كمية الكنب اللى فى البلد واخذ يقول فى نفسه”
-ما احنا بقالنا 30 سنه بنقف فى طوابير ايه الجديد؟
– هيا الناس دى مبرمجه دماغها،انا حاسس انهم حافظين كلام وبيرددوه
-المجلس العسكرى عرف يكره الناس فى الثوره ..ربنا يولع فيه،منك لله يا مجلس يا عسكرى
ثم صرخ<< يسقط يسقط حكم العسكر>>
“وفجأه يلتفت حوله فلايجد احد غيره فى المكان” فأسرع الى شباك الفرن ليأخذ العيش
فأعطى البائع الفلوس واذا بالبائع يعطيه العيش ووجهه عابس يملؤه الغضب
ثم قال له البائع: ده انت هتتنفخ
أخذ ثورجى العيش منه بوجه عابس ايضا ثم هتف بكل حماس
<< يسقط يسقط حكم العسكر >>

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: