بقلم . شريف عمر : خــربـوا البلـد بتـوع التحــرير ( حــوار بـيـن اب وابـنـــه )

بينما كان الاب متابعاَ لنشـرة اخبار التاسعه علي التليفزيون المصري .. كان إبنه جـالساَ علي جهاز الكمبيوتر الخاص به ويتصفح الاخبار وينتقل من صفحه الي اخري علي الفيس بوك

اذ به يسمع صوت ابيه يقول ” خربوا البلد .. خربوا البلد بتوع التحرير ”

ولكنه إبنه لم يهتم او لم يشغل باله فهو اعتاد علي ان يسمع هذا الكلام من ابيه

لم تمر دقائق وسمع صوت ابيه مره اخري يقول ” اهم بلطجيه ومعاهم سنج ومطاوي كمان “

عندها خرج منصور ابنه عن صمته سائلاَ ابوه

: فيه ايه يا بابا ؟

الأب: خــربوا البلد بتوع التحرير.. تعالي اتفرج قبضوا عليهم اهو وطلعو واخدين فلوس علشان يولعوا ويحرقوا في البلد

الإبن: مين قالك بس انهم بلطجيه وقابضيين وممولين علشان يحرقوا البلد ؟

الأب: اهو يابني التليفزيون جايبهم شايف اشكالهم عامله ازاي

الابن: بس يا بابا دا التليفزيون المصري

المشكله انك مصدق اعلام فاشل مش بيجيب الحقيقه .. طيب غير المحطه كده هات قناة الجزيره او قناة التحرير

الأب: انتوا مش فاهمين حاجه البلد بتولع وانتو مضحوك عليكوا , قناة الجزيره ايه ولا قناة التحرير ايه اللي انت بتتكلم عنها , القنوات دي يابني قنوات مموله ومأجوره عايزيين يخربوا البلد

*طيب ايه رأيك انا اتفرجت علي توفيق عكاشه امبارح كان بيقول ….

الإبن مقاطعـاَ ابيـــه : ميـــن ؟؟ توفيق عكــاشه ؟؟

الاب: ايوا يابني الدكتور توفيق عكاشه

الابن ضـاحكـاَ   : قال ايه الدكتور الجهبز العالم توفيق عكاشه

الاب:   كان بيقول كلام خطير جداَ .. كان بيقول ان مصر بتتعرض لمؤامره اجنبيه وراها دول زي امريكا تهدف لتفكيك المؤسسه العسكريه وتقسيم البلد .. والثوار بقي بيساعدوا علي تنفيذ المؤامره دي عن طريق الجمعيات والحركات اللي امريكــا بتمولهم وبتدربهم

الإبن:  مش اي كلام يتقال علي اعلام مصر سواء قنوات مصريه حكوميه او قنوات مطبلاتيه يتصدق

انا هكلمك بعيداَ عن تاريخ توفيق عكاشه ونفاقه .. هنتكلم بالعقل والمنطق

دلوقتي امريكا بتعطي الجيش المصري سنــوياَ 1.3 مليــار دولار يعني لو عايزه تفكك الجيش مش هتعطي حركات فلوس علشان تفككه , لكنــها بسهوله جداَ ممكن تقطع المعونه عنه وبفرض وجود مؤامره ليه لم يتم تحديد الحركات والجمعيات اللي بيقولوا انها بتاخد اموال من امريكا ويقدموهم للمحاكمه بدلاَ من من اطلاق الاتهامات عليهم بدون دليل

المشكله يا بابا انك سلمت عقلك لاعلام مصري ” يصر ان يكون إعلام فاشل ”  فما يقال اليوم عن الثوار انهم ” بلطجيه” و ” عملاء”  و” خونه” يجعلنا نرجع بالذاكره لأحداث 25 يناير الماضي واللي كان بيتقال فيها علي الثوار نفس الكلام من ” خونه ” وقابضيين ” وغيرها من الكلمات والمصطلحات

فنفس السينــاريو يتكــرر الاَن في ” نفس الاعلام المصري ”

وأحب افكرك بمقولة  هتلر لما قال

” اذا اردت السيطره علي الناس , فبلغهم ان وطنهم في خطر , وان امنهم تحت التهديد ثم شكك في وطنية من يعــارضك ”

يعني بالبلدي كده شكك في كل اللي بيعارضك وفهمهم ان بلدهم بتضيع وان الناس اللي بتعارضني دي عملاء ومموليين من اللهو الخفي وعايزيين يخربوا البلد  وبالتالي الشعب يتفرق ومن هنـا  يسيطروا عليه

نفذ هذه المقوله من قبل ” المخــلوع مبارك ”

وينفذها الان ” المجلس العسكري ”

وكمــا كــان هنــأك لمبــارك وحاشيته ” بلطجيــه ” لتشويه الثوره والثوار

هنـــاك أيضــاَ للمجلس العسكري ” بلطجيه ” لتشويه الثوره والثوار

الأب ينظر الي إبنه متعجبـاَ ويقول : كلامك مقنع جداَ يا إبني بس انت ازاي عرفت الحاجات دي كلــها ؟

الإبن : يا بابا احنا جيــل فـهٌم نفسه بنفسه وثقٌف نفسه بنفسه . عرفنا اخبار العالم كلها من مصدرها مكناش بنتابع نشرات مبارك زي الجيل بتاعكم .. ببساطه يا أبي فصلنا عقولنا عن الاعلام الذي دمر عقولكم .

إستمدينا ثقافتنا السياسيه من النت ومن الاخبار الحقيقيه ومن اكتر من مصدر ..بقي عندنا حاجه اسمها التنوع السياسي اللي خلق عندنا الوعي السياسي .. انما الجيل بتاعكم كنتوا بتسمعوا نشرة اخبار كلها عن مبارك راح فين وجه منين وشوية تطبيل له وتخلص النشره علي كده وتقوموا تناموا

الأب : طيب والثوره عملتلنا ايه , ما احنا بقالنا سنه بنسمع عن الثوره , ومشوفناش فيها غير الانفلات الامني والتأخر الاقتصادي ومستفدناش اساسا اي حاجه من الثوره

الإبن :  الثــوره يا بابا كســرت فينا حاجز الخوف .. بقينا مش بنخاف نقول رأينا وانت نفسك كنت طول عمرك تقول خلينا في حالنا .. ملناش دعوه بالحكومه .. خلينا ماشيين جمب الحيط ..

ودلوقتي بتتكلم وبتتناقش في امور بلدك وانت مش خايف .. وبعدين البلد بقالها 30 سنه فيها انفلات امني وتأخر اقتصادي وإلا مكناش عملنا ثوره من اصله .. بس الفرق اننا اعترفنا بوجود انفلات امني

كان قبل كده فيه بس مكنش حد يقدر يتكلم

  • الثوره قضت علي مشروع التوريث وحلت مجلس الشعب المزور
  • والاهم من دا كله ان الثوره عملتلنا كرامه وسط العالم

” الاب ينظر الي ابنه ويصمت لحظــات سانداً ظهره الي الخلف ثم يسند ذراعه علي مسند الاريكه سائلا ابنه ..

* طيب وانتو مش عايزيين تصبروا ليه بس .. المجلس العسكر ي قال انه هيسلم السلطه في يونيو خلاص لرئيس منتخب ومجلس الشعب هيجتمع في 23 يناير

الإبن : كــان ممكن نصبر لو كان المجلس العسكري قال انه هيسلم السلطه في منتصف 2012 اول ما مسك بعد الثوره .. مش يقول انه هسلمها بعد 6 شهور وبعد كده يقول هيسلمها في 2013 وبعدين يرجع بعد كده بضغط شعبي لـ 2012

*كان ممكن نصبر لو كـان المجلس اكتسب ثقة الشعب

* كان ممكن نصبر لو مكنتش أيادي الجيش ملــوثه بدمــاء جديده بعد ما أقسموا انهم لم ولن يطلقوا النار علي اي مصري

*كان ممكن نصبر لو كان المجلس اثبت جديته في إرجاع حقوق الشهداء والمصابيين مش يزودهم تاني

* كان ممكن نصبر لو شايفيين ان الدستور بيتعمل لحساب البلد مش لحساب المجلس

من الاخـر كده ” اللي خلانا منستناش علي مبارك 6 شهور هي نفس الاسباب اللي تخلينا منستناش علي طنطاوي 6 شهور – وخصوصاً اننا استنينا الـ 6 شهور اللي هو وعد بيهم في الاول وكانت النتيجه انه فضل يحافظ علي السلطه وقام بتلميع شخصيات النظام السابق وتشتيت الثوار وتشويه سمعتهم .. واتهامه لحركات اساسيه في الثوره اللي بيدُعي انه حمــاها .. علشان كده لازم المجلس العسكري يتفضل يسلم السلطه ويرجع لثكناته ولمكانه الطبيعي

الاب : عمــالين تقولوا تسليم السلطه تسليم السلطه , طيــب ولو المجلس العسكري مشي مين هيمسك بداله ؟؟

الإبن : اللي هيمســك بداله وبكل بساطه يا بابا هو رئيس مدني منتخب بعد تكوين البرلمان .. وبالمناسبه إستفتاء 19 مارس كان فيه ان انتخابات الرئاسه قبل الدستور واتوافق علي القانون ده بالاغلبيه فالمطلوب حالياً وبطريقه شرعيه موافق عليها اغلبية شعب مصر ان الانتخابات الرئاسيه تتعمل بعد البرلمانيه علطول والمجلس العسكــري ما يتدخلش في الدستور

.. فيهــا حاجه دي يا بابا ؟؟

” الاب مبتسمـاَ وقد ظهرت عليه علامات الدهشــه ”

يااااه والله كلاام عين العقل .. بس انتوا اكيد خلاص نازليين يوم 25 يناير الجاي ؟؟

الابن :  طبعـاَ يا بابا .. لازم ننزل علشان نكمل ثورتنا ونكمل المشوار اللي بدأناه .. نازليين علشان كُتب التاريخ متوصفناش علي اننا اكتر جيل مُعاق ذهنياَ جه في تاريخ مصر .. علشان ميقولوش علينا اننا جيل عمل نفسه بُرم ومفتح وانتقد الاجيال اللي قبله علي سكوتها علي الظلم فعمل ثوره علي النظام الظالم ده لحد ما اسقطه وبعد كده بدل ما يحكم هو ادي الحكم للنظام الظالم اللي ثار ضده واسقطه .. علشان كده لازم نكمل ثورتنا .. علشان نحقق المطالب اللي نادينا بيها في الاول وهي

” عيـــش , حـــريه , عــداله اجتماعيه ”

الأب : الله يخربيت الإعلام المضلل اللي ضحك علينا وضللنا وخلانا نشتم ونسب في اطهر ناس في مصر

انا اسف ليكوا كلكوا .. انا اسف لكل شاب حر نزل يطالب بحق الشعب في الحريه وشتمته من غير ما اقصد نتيجة اني صدقت اعلام بيستخدمه الحاكم اداه لنفسه ..

* انا نازل معاكوا يوم 25 يناير الجاي علشان اجيب حقكوا يا ولادي

” الإبن يقوم بتقبل رأس ابيه ويقول له ”

: لا يا بابا خليك انتا وإحنا هننزل وهنكمل وهنجيب حق اخواتنا اللي ماتو وهنحمي ثورتنا من الذئاب اللي التفوا عليها بس امانه عليك تدعيلنا وتكون معانا بقلبك وامانه عليك يا ابويا .. امانه عليك .. لو انا مت .. اوعي تصدقهم لو قالوا عني اني بلطجـــي

https://www.facebook.com/notes/sherif-omar/

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: