بقلم . شريف عمر : أي كلام يا عبــد الســـلام

عبد السلام راجل مصري مبيحبش المشاكل وطول عمره كان يمشي جمب الحيط

لما الثوره قامت في 25 يناير 2011 كان دايماَ بيقول الناس دي ” هتخرب ” البلد الناس دي ” عملاء ” وخونه ” وفيهم كمان ” اجانب ”

اه نسيت اقولكوا ان عبد السلام مدمن مشاهدة التليفزيون ” المصـــري طبعاَ ”

 

امــال ايه .. يعني عايزينه يتفرج علي قنوات عميله ومموله علشان تخرب بلدنا ” هــو سمع الخبراء الاستراتيجيين بيقولوا كده لما التليفزيون المصري استضافهم  ايام الثوره

 

 

ولما حد كان يحاول يفهمه مكنش يسمعله .. المهم دارت الايام ولفت والثوره نجحت وسقط مبارك .. ساعتها بدأ عبد السلام يعرف ان الثوره حقيقيه وانها ثورة شعب ومفيش اي حاجه صح من اللي كان بيسمعها  وان الاعلام هو اللي كان بيشوه صورة الثوره والثوار

فرح عبد السلام وقال انا مبسوط ان نظام مبارك اخيراَ سقط  ونزل لاول مره الميدان ” علشــان يحتفل ” مع الثوار .. وطبعاَ مسك المجلس العسكري مقاليد الحكم .. ومنذ هذه الايام لم اري عبد السلام الا بالامس

بالامس فقط قابلت عبد السلام , فأنا لم اقابله منذ ان احتفلنا سوياَ بسقوط مبارك

وجدته غاضباَ ناقماَ علي الثوره والثوار ..  اصطحبته الي منزلي لأتحدث معه واعرف منه ما كل هذا السخط والغضب الذي يحمله للثوره والثوار .. المهم اتكلمنا مع بعض وحاولت افهم بيفكر ازاي

قالي

 

عبد السلام:دلوقتي انا عايز اعرف الثوره عملتلنا ايه ما احنا بقالنا سنـه بنسمع عن الثوره ومشوفناش فيها غير انفلات امني وتأخر اقتصادي ومستفدناش اي حاجه من الثوره

 

أنا:الثوره يا عبد السلام كسرت من جوانا حـاجز الخــوف وبقينا مش بنخــاف نقول رأينا وانت نفسك كنت طول عمرك ماشي جمب الحيط ودلوقتي بقي ليك صوت وبتتكلم وبتتناقش في امور بلدك في اي مكان

وبعدين البلد بقالها 30 سنه فيها انفلات امني وتأخر اقتصادي والا مكناش عملنا ثــوره من اصله بس الفرق اننا اعترفنا بوجود انفلات امني كان قبل كده فيه بس مكنش حد يقدر يتكلم

*الثوره قضت علي مشروع التوريث وحلت مجلس الشعب المزور .. والاهم من دا كله ان الثوره عملتلنا كرامه وعزه وسط العالم كله

*الثوره ثقفتنا جداَ . وانا واحد من الناس اللي اتعلمت واتثقفت وفهمت في السنه اللي فاتت دي بس اكتر من اللي عرفته في عمري كله الثوره خلتنا نقرا التاريخ الصح وندور عليه .. مش التاريخ اللي كان النظام مزوره ومفصله لنفسه

 

” عبد السلام ينظر اليا بتركيز ثم يأخذ نفساَ عميقاَ ويخرجه ثم يقول ”

طب انتو مش عايزيين تصبروا ليه بس؟ ..المجلس العسكري هيسلم السلطه في يونيو خلاص لرئيس منتخب ومجلس الشعب هيجتمع في 23 يناير

 

أنــا: كـان ممكن نصبر لو كان المجلس العسكري قال انه هسلم السلطه في منتصف 2012 اول ما مســك بعد الثوره .. يعني مش يقول انه هيسلم بعد 6 شهور وبعد كده يقول هنسلمها في 2013 وبعدين يرجع بضغط شعبي لـ 2012

كان ممكن نصبر لو كان المجلس اكتسب ثقة الشعب

كان ممكن نصبر لو مكنتش ايادي الجيش ملوثه بدماء جديده بعد ما اقسمو انهم لم ولن يطلقوا النار علي اي مصري

كان ممكن نصبر لو كان المجلس اثبت جديته في ارجاع حقوق الشهداء والمصابيين مش يزودهم تاني

كان ممكن نصبر لو شايفين ان الدســتور بيتعمل لحســاب البلد مش لحســاب المجلــــــس

من الاخر كده اللي خلانا منستناش علي مبارك 6 شهور هي نفس الاسباب اللي تخلينا منستناش علي طنطاوي 6 شهور .. وخصوصاَ اننا استنينا اللي المجلس وعد بيهم في الاول وكانت النتيجه انه فضل يحافظ علي السلطه وتلميع شخصيات النظام السابق وتشتت الثوار وتشويه سمعتهم واتهامه لحركات اساسيه في الثوره اللي بيدَعي انه حمــاهـا علشان كده لازم يسلم السلطه ويرجع لثكناته ولمكانه الطبيعي

عبد السلام: عمــال تقول تسليم السلطه تسلم السلطه .. طيب لو المجلس العسكري مشي مين هيمسك السلطه بداله ؟

أنــا: يا سيــدي اللي هيمسك السلطــه وبكل بســاطه هو رئيس مدني منتخب بعد تكوين البرلمان وبالمناسبه استفتاء 19 مارس كان فيه ان اتخابات الرئاسه قبل الدستور واتوافق علي الكلام ده بالاغلبيه .فالمطلوب حاليا وبطريقه شرعيـه موافق عليها اغلبية شعب مصر  ان الانتخابات الرئاسيه تتعمل بعد البرلمانيه علطول والمجلس العسكري ما يتدخلش في الدستور

دي حاجه صعبه او ملناش حق فيها يا عبد السلام ؟

 

عبد السلام: بس يا شريف اللي في التحرير دول بلطجيه والثوره بقت مش سلميه واللي بيحصل فيهم دا حاجه يستحقوها

أنــا: المشكــله يا عبد السلام انك سلمت عقلك لأعلام مصري ” يصر ان يكون أعلام فاشل ”

فما يقال اليوم عن الثوار انهم بلطجيه وخونه يجعلنا نرجع بالذاكره لأحداث 25 يناير الماضي والتي كان يقال فيها عن الثوار نفس الكلام من ” عملاء و” خونه ” وقابضين” وغيرها من المصطلحات

نفس السيناريو يتكرر الان من نفس الاعلام ” المصري”

وفيه مقوله لهتلر قال فيها ” اذا اردت السيطره علي الناس فبلغهم ان وطنهم في خطر وان ” امنهم ” تحت التهديد ثم ” شكك” في وطنية من يعارضك

 

يعني بالبلدي كده شكك في كل اللي بيعارضك وفهمهم ان بلدهم بتضيع وان اللهو الخفي هيجي يقتلكوا لو مسمعتوش الكلام

وطبعا علشان يوصل الافكار دي للناس هيوصلها عن طريق الاعلام الحكومي بتاعه وبالتالي الناس تكره الثوره والثوار ويموت الثوره

 

نفذ هذه المقوله من قبل ” المخلوع مبارك ”

 

وينفذها الان ” المجلس العسكري “

فكما كان هناك  ” لمبارك وحاشيته ” .بلطجيه . ” لتشويه سمعة الثوره والثوار

هنــاك ايضاَ ” للمجلس العسكري ” بلطجيه “لتشويه سمعة الثوره والثوار

عبــد السلام : فعــلاَ والله قبل الثوره كانوا برضه بيقولو عليهم بلطجيه ومخربين ودلوقتي بيعيدوا نفس الكلام

واضح ان التليفزيون المصري دا يا شريف بيقول اي كلام

 

أنـــــــا : أيوا فعلا التليفزيون المصــري بيقـول ” أي كــلام يا عــبد الســلام

Advertisements

2 responses to “بقلم . شريف عمر : أي كلام يا عبــد الســـلام”

  1. mostafa mahmod says :

    مقال رائع بيوصف بالظبط اللي بيحصل في البلد بمنتهي البساطة من ساعة قيام الثورة, بس انا عندي سؤال هل سيترك المجلس العسكري نفسه عرضة للمحاكمة علي ما ارتكبه من جراااااااااااااااااائم لا تقل فظاعة عن الجرائم التي ارتكبها نظام مبارك بهذه السهولة , فهو قام بتوريط صغار ضباطه ايضا, فالمسألة اصبحت حياة او موت بالنسبة للمجلس ولضباطه المشتركين معه في جرائمه.

  2. abdo says :

    رااااااااائع رااااااااااااائع راااااااااااااااائع ..اكثر من رائع ودقيق في الوصف

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: