احتفل معانا بعيد الشرطه يوم 25 يناير الساعه 4 م امام دار القضاء العالى

يوم الاثنين 25 يناير
يوم عيد الشرطه

واليوم ده كان علشان تضحية رجال الشرطه فى الاسماعيليه فى مواجهة الاحتلال البريطانى
رجال الشرطه بتوع زمان

السنه دى و لأول مره فى تاريخ مصر و سابقه قد تعد الاولى من نوعها فى العالم هايكون اليوم ده اجازه رسميه

علشان نحتفل كلنا بعيد الشرطه و رجال الشرطه
رجال شرطة دلوقتى .. مش رجالة زمان

يوم 25 يناير هناخد اجازه ونحتفل كلنا بخدمات و تضحيات الشرطه ووزارة الداخليه

هانحتفل كلنا بالشرطه المصريه اللى اسائت لسمعة مصر و شوهت صورتها بالممارسات القمعيه وعدم احترام حقوق الانسان

هانحتفل بالاعتقالات اللى بمناسبه و بدون مناسبه فى ازهى عصور الحريه

هانحتفل كلنا برجال الشرطه هواة التعذيب فى الاقسام

هانحتفل برجال الشرطه االلى بيقولوا انهم اصحاب البلد واللى بيعاملوا المواطنين كأنهم عبيد

هانحتفل كلنا بالتلفيق اللى بيحصل لكل النشطاء السياسيين زى تهم التجمهر وتكدير الصفو العام

هانحتفل كلنا بالشرطه اللى بتمنع التعبير السلمى عن الرأى و بتمنع اى احتجاج سلمى فى الشارع و لو حصل بتبقى حريصه على اخفاؤه وعدم وصوله للناس

هانحتفل بالشرطه اللى بتمنع الاحزاب من التواصل مع الجماهير

هانحتفل كلنا بالشرطه المصريه اللى بتمنع حتى الاعتراض على تصدير الغاز لإسرائيل

هانحتفل كلنا بالشرطه والداخليه اللى بيحموا اللصوص الكبار اللى بينهبوا البلد و يمصوا دم الغلابه

هانحتفل كلنا بالشرطه و الداخليه اللى بتتستر على الفساد و الانحراف من اعضاء الحزب الوطنى

هانحتفل كلنا برجال الشرطه البواسل اللى بيزوروا الانتخابات لصالح لصوص الحزب الوطنى و بيمنعوا المواطنين من حق الانتخاب الحر

هانحتفل برجال المرور اللى بياخدوا رشاوى و بيبقى كل همهم كل يوم ازاى يخلصوا دفتر المخالفات

هانحتفل بظباط المباحث اللى مايعرفوش حاجه عن البحث الجنائى و كل اللى يعرفوه قاعدة الاعتراف سيد الادله .. وعلشان كده فى اى جريمه تحصل فى اى شارع تلاقيهم متخصصين فى التعذيب و الكهربا و النفخ و التحرش الجنسى للحصول على اعترافات تظبط ورق القضيه

هانحتفل بوزارة الداخليه اللى لو نشرت ربع عساكر و بلطجية الامن المركزى فى مصر كلها لتنظيم المرور فى المواقف و الاشارات كانت اتحلت مشكلة المرور من زمان

هانحتفل بوزارة الداخليه اللى لو نشرت ربع عساكر الامن الامركزى فى شوارع و حوارى مصر كانت اعادت الانضباط للشارع المصرى و انتهت حوادث الاغتصاب و السرقه بالاكراه و بيع المخدرات العلنى المنتشر فى شوارع مصر

هانحتفل بالداخليه اللى مهتمه بالامن السياسى وحماية لصوص الحزب الوطنى و الحكومه اللى بيمصوا خير البلد .. الداخليه اللى بتراقب كل خطوات المعارضين و بتجيش ألف عسكرى لكل متظاهر واحد … و بتهمل الامن العام لغاية ما شوارع مصر اصبحت قمه فى الفوضى

هانحتفل بفلان باشا اللى الكارت بتاعه بيخليك ماتقفش فى اى طابور فى اى مصلحه حكوميه
هانحتفل بالظابط المرتشى و الظباط رجال الاعمال من الباطن

ماننكرش ان فيه ظباط شرطه محترمين وشرفاء فى الداخليه فى كل التخصصات و الادارات و لكنهم للأسف اصبحوا اقليه منبوذه ومالهومش اى صوت

التعذيب و الفساد و حماية اللصوص و الفاسدين بقى اسلوب منهجى لوزارة الداخليه

والظابط الشريف اصبح هو الاستثناء

تعالوا نتجمع يوم الاثنين 25 يناير الساعه 4م أمام دار القضاء العالى للإحتفال سويا بعيد الشرطه

وعلشان مظاهر الاحتفال تبقى تمام يا ريت كل اللى ييجى يلبس اسود

———————————–
نرجوا نشر الايفينت على اوسع نطاق و دعوه كل الاصدقاء على الفيسبوك و خارج الفيسبوك

—————————————–

نرجوا من جميع الزملاء من النشطاء السياسيين و الحقوقيين والمدونين و جميع الشباب من جميع الاحزاب و التيارات السياسيه وكذلك منظمات المجتمع المدنى الاشتراك فى الدعوه ونشرها على اوسع نطاق

للمزيد من المعلومات

الجروب الرئيسى على الفيسبوك
http://www.facebook.com/group.php?gid=9973986703

البث التجريبى لموقع شباب 6 ابريل
http://6april.org

المجموعه البريديه لشباب 6 ابريل نرجوا الاشتراك الآن
http://groups.yahoo.com/group/shabab6april/

مدونة شباب 6 ابريل
https://shabab6april.wordpress.com

خدمة تويتر لشباب 6 ابريل
اشترك على تويتر و اعمل تتبع لشباب 6 ابريل
وتوصلك اخبارنا على طول
http://twitter.com/shabab6april

الايميل الرسمى للحركه
shabab6april.mov@gmail.com

0102864919

0110479445

7 responses to “احتفل معانا بعيد الشرطه يوم 25 يناير الساعه 4 م امام دار القضاء العالى”

  1. yasser esmail says :

    nice blog

    i wanna from you to visit this blog

    http://blogging-money-123.blogspot.com

    you will find

    blogging tips

    blogger tricks

    earn money from your blog

    blogger templates

    seo lessons

    all about adsense, adbrite, bidvertiser, clickbank

    and more

    we have new post every day

  2. romnc says :

    شكرا جزيلا

  3. عبد الرحمن says :

    الى صاحب المدونة

    ألى ادارة المدونة
    نرجوا عمل هذا الموضوع فى المدونة لديكم

    موقع للرد على زكريا بطرس بالكتب التى يتكلم منها وتصويرها فى الفديو بتصوير غلاف الكتاب والصفحات برد علمى وتوضيح للمشاهدة كذبه على الاسلام العظيم

    بداية النهاية لزكريا بطرس وامثاله

    http://www.akazeab.com

    Site to respond to Zakaria Boutros
    Shows the lie of Islam Zakaria Boutros

  4. عبد الرحمن says :

    الى صاحب المدونة

    نرجوا عمل هذا الموضوع فى المدونة لديكم

    موقع للرد على زكريا بطرس بالكتب التى يتكلم منها وتصويرها فى الفديو بتصوير غلاف الكتاب والصفحات برد علمى وتوضيح للمشاهدة كذبه على الاسلام العظيم

    بداية النهاية لزكريا بطرس وامثاله

    http://www.akazeab.com

    Site to respond to Zakaria Boutros
    Shows the lie of Islam Zakaria Boutros

  5. المصرى says :

    بخصوص د. نيفين فقد تكون بالفعل احد رجال الحكومة وقد لا تكون وبحالة انها مواطنة فلها حق ان تقول رايها بالطبع فالناس تطالب بالديموقراطية ولكن نرجو منها عدم استخدام هذه النبرة التى تستفز الشباب

    واذا كان هناك من نقد يوجه للتظاهرة او لحرة 6 ابريل فهو عدم اتفاقها على مطالب وشعارات معينة وواضحة يتم الخروج عنها لحتى لا تصير المظاهرة فخ للبعض او يتم الركوب عليها من بعض الاتجاهات او تحتوى على شعارات ليست عليها اجماع وطنى ونتمنى ان امكن تدارك هذه النقاط وتوضيح الامور

    وطبعا بالاضافة الى ذلك كان يجب ان نرفع شعار الدولة المدنية ويكون واضح لحتى يكون اولا دعوة لاخوتنا المسيحيين الذين لا نشكك بوطنيتهم ابدا للتوحد حول مطالب هى لكامل الشعب والوطن وثانيا عدم رفع ايي شعارات دينينة لان الحكومة تصورها وتبحث عنها لترسلها ردا على اي استجوابات دولية وعالمية لتقول لهم انهم المتطرفون وانصار الفتنة الطائفية الى ما اخره وهم يحسنون استغلال هذه الامور جدا

    ثانيا لا ارى من داعى للدكتور البردعة لتواجده بشخصه فى المظاهرة لحتى لا يدبر له الامن فخا ما ويكفى انه تبرع بان يكون رأس حربة الحركة الوطنية امام العالم واذا اردت ان تطاع فلا تأمر الا بالمستطاع فلا داعى لتقديم الدكتور البرادعى الان باول التحركات الشعبية التى نأمل ان تكون هذه شرارتها لحتى لا يكون كبش فداء باول الطريق ثم لا نجد رأس للحركة وبديل نتفق عليه بديلا للنظام والدكتور يشكر على ما يقوم به فهو كثير وليس بقليل

    ثم انى الوم بشدة الذين يتحسسون من التدخل الدولى وكأن ايا حكم ديموقراطى سياتى بهذه الطريقة سيقدم للخارج اكثر مما يقدمه النظام الحالى وما خفيا كان اعظم ، فلا داعى للتحسس لمن يحاول مساعدتنا واعطاء النظام زريعة ليقول ما يحلو له لتبرير قمعه اذا اراد اما العالم ، ثم بعد ان يكون قرارنا بيدنا وكل شيء بديموقراطية فاي دولة ستأخذ منا اكثر مما تأخذه الان ؟!
    فلنلخص مطالبنا دولة مدنية ، انتخابات حرة وبمراقبة دولية والا فلن يتوانى النظام عن تزويرها بنسبة 99.9999 المعهودة تاريخيا بمصر والتى باتت مزحة نتداولها بين الاصداقاء

    ولابد من مشاركة السياسيين بالمظاهرة وتكون لها قيادات واضحة لحتى يتم توجيهها او اعطائها الاشارات عند ملاحظة اى تحركات او افخاخ من الامن لاجهاض المظاهرة

    دولة مدنية لا تفرق بين الاخوة المصريين وتعطى اخوتنا المسيحيين حقوقهم وتعاملهم بالمثل ونطمأنهم اننا اصبحنا ندرك احتياجات الوطن من دستور جديد مدنى لا يميز بين مصرى واخرى على اساس الدين

    فبالاتحاد قوة والتحرك الذى نسعى اليه لن نستطع تحقيق نجاحات منه قبل ان يشارك الجميع فى ذلك

    دولة مدنية ، انتخابات حرة ،رفع الحد الادنى للاجور ، حرية تأسيس الاحزاب

    فلتكن هذه مطالبنا ليجتمع حولها كامل المجتمع المصرى وينال التحرك القوة اللازمة لتحقيق اهدافه

    الى النصر يا شعبنا

  6. المصرى says :

    انا ما انتبهت الى انكم حددتم شعارات ومطالب نظرا لتأخرى فى متابعة الموضوع فاتذر لذلك واملا ان تظهر رسالتى لما فيها من افكار اخرى

    وبالتوفيق لنا جميعا

  7. العمدة says :

    انا شاب عندى 30 سنه
    يعنى المفروض محسوب على الشباب فى البلد دى
    بس عايز اسأل سؤال
    مين اداكم الحق فى انكم تتكلموا بأسم كل شباب مصر؟
    انا معترض على سياسة البلد ( ظلم و فساد )
    لكنى محترم
    اعرف ازاى اتكلم مع الى اكبر منى
    مش بتبجح ولا بطول لسانى ولا بعلى صوتى
    على ناش كبار وحكام ( الله ورسوله ) امرونا بطاعتهم
    مش بس احترامهم
    بس انتو معليكمش عتب
    عشان انتو ترئسكم واحدة بت
    ازاى حتعرفوا معنى الاحترام
    انتم من اشعلتم نار الخراب
    انتم من ايقظتم الفتنة
    انتم من قتلتم القتلى
    واشعتم الفوضى
    لا تتنصلو من مسؤلياتكم
    ف دم الشهداء يسيل من بين اصابعكم
    حسبى الله ونعم الوكيل فيكم
    يا شباب 6 ابريل

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: