23 يوليو 2008

و زى ما اتفقنا قبل اليوم ده

كنا رايحين اسكندريه نقابل اعضاء شباب 6 ابريل هناك … نتناقش فى الرؤيه و الاهداف و التحرك فى اسكندريه

و بعد الكلام و الحوارات كان الاتفاق اننا نروح على البحر و نعمل حاجات مجنونه

و بالفعل

فيه ناس اتجمعت فى القاهره الصبح و راحوا مع بعض

و ناس طلعوا من محافظات تانيه

و ناس كانوا مستنيين فى اسكندريه

حزب الغد فى اسكندريه مشكورا استضافنا فى مقره بجناكليس


و قعدنا نتكلم و نتكلم و نتكلم






لغاية ما زهقنا و اخيرا قررنا ننزل بقى

اتقسمنا مجموعات و اتحركنا على مكان محدش يعرفه غير شخصين

و هربنا من المراقبه او هكذا خيل لنا

و لما روحنا المكان السرى … لقينا الامن مستنينا … زى ما توقعنا

بدلنا الخطه للمكان السرى التانى

المفاجئه بقى هنا اننا لقينا برضه الامن مستنينا

بدلنا الخطه للمكان السرى التالت

المره دى بقى لقينا الامن مستنينا بأعداد كبيره … سبحان الله

الناس قعدت على البحر و خلاص … نرجع  ولا نكمل؟؟؟

لا هانكمل … هانكمل



بصوا مافيش مظاهرات

هانعمل طياره كبيره عليها علم مصر

هانقعد نغنى أغانى الشيخ إمام

هانلم الناس حوالينا

هانعمل مسرحيات كوميديه

هانتكلم مع الناس




جه عمو الظابط … ياللا يابنى من هنا انت و هو

ممنوع تقفوا على الشط

ليه؟؟؟

هو كده


ممنوع تطيروا طياره عليها علم مصر … و ادى الطياره اهى .. اهيه … ورونى هتطيروها ازاى

ليه .. طب لو طيرنا طياره عليها علم امريكا او اسرائيل كنت تقدر تقطعها

بص يابنى ..ممنوع التجمهر على البحر … الاومر كده

اقبض بقى على المصيفين كلهم

لو قفلت معايا هاقبض على الشط كله… و ده اخر كلام

الكلام يزداد حده … و المخبرين يزدادون عددا

ياللا يا جدعان .. هانغير المكان


بعدنا كتير عن المكان و اتفرقنا و اتجمعنا قال يعنى تمويه

تتفقوا على ايه

نرجع القاهره و لا نكمل فى مكان تانى

هانكمل …هانكمل… هانكمل

تعيش الديمقراطيه


نبدا الغنا

الناس تتلم

نسخن … الناس فى الشارع مبسوطين

و فيه ناس بتسقف



فجأه

ينقض  ظببابيط امن الدوله …حماة الوطن الأشاوس المغاوير بقيادة البطل ابن البطل “عبعزيز هيبه” .. لتقطيع علم مصر و ضرب شباب مصر اللى بيحبوا مصر

اشتباكات قليله و يتم اعتقال البعض و نجاة البعض


الجديد بقى ان اللى نجوا من الاعتقال عملوا مظاهره مع اهالى طوسون تانى يوم فى اسكندريه … ولا بنخاف ولا بنطاطى .. احنا كرهنا الصوت الواطى






و كالعاده لازم الجداد ياخدوا الوش الأولانى بتاع اول مره

لكن القدام بيكونوا هارشين الحوارات الحمضانه بتاعة امن الدوله

و طبعا التهم جاهزه و بقالها خمسين سنه بتتقال ناقص بس يتكتب المحضر بسرعه و يتصلوا بوكيل النيابه و يقولوله القرار و يظبطوا الورق و التواريخ علشان كل حاجه تبقى سليمه

ثم تبدا الرحله المعروفه

قسم ثم نيابه ثم قسم ثم نيابه ثم ترحيلات ثم سجن ثم نيابه ثم سجن ثم محكمه ثم افراج ثم سجن ثم ترحيلات ثم قسم المحافظه و كله بتساهيل ربنا

أول يوم تم اعتقال 13 ولد و بنت  واحده جدعه جدا اسمها ماهينور  …وواحد كمان كان ماشى فى الشارع مالوش دعوه بحاجه


مدحت شاكر-مصطفى ماهر-محمد محمود- احمد عفيفى- باسم فتحى- نور الدين – عمرو – احمد نصار- احمد عبد الوهاب – خالد عادل – يوسف شعبان- المعتصم بالله – طارق جمال

تانى يوم تم اعتقال احمد ماهر علشان قضية التنظيم تبقى مسبوكه و منطقيه و يشيل هو تهمة تأسيس جماعه غير شرعيه لقلب نظام الحكم

بس المره دى كان فيه محكمه و استئناف و براءه و استئناف للحكم و تاكيد البراءه

لسه فيه قضاه محترمين فى مصر



و كالعاده

الناس اللى بره بيبقوا تعبانين سواء فى توفير سبل الراحه للى جوه و توفير مواد الإعاشه من مأكل و ملبس و حياه كريمه




او فى تنظيم الضغوط المستمره للمطالبه بالافراج و متابعة الإعلام و المحاميين








و الايام عدت

و أخدنا براءه مرتين

و طبعا الداخليه لازم تقرفنا فى اجراءات الافراج و نلف مصر كلها









و فى الاخر الناس خرجت و بتكمل و هاتكمل

طول ما انت صح … ما يهمكش حد

هما إللى خايفين منك  .. مش انت إللى خايف




و توته توته .. خلصت الحدوته

One response to “23 يوليو 2008”

  1. يوسف محمد says :

    انتم الغد الصاعد !
    ربنا معاكم

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: