ما بعد 4 مايو

عن 4 مايو و ما بعد 4 مايو

كان معادنا التانى يوم 4 مايو .. و ده كان المقصود منه ايصال رساله لمبارك فى عيد ميلاده انه يراعى الناس و إن الناس غاضبه جدا من سياسته و طريقة ادارته لمصر
هدفنا هو ايقاظ الشعب من الغيبوبه و كيفية المطالبه بحقوقه البسيطه .. هدفنا نشر الإيجابيه بعد سنوات طويله من الخوف و الرعب ..
بعد 6 ابريل ناس كتير بدأت تتكلم ..و بعد 4 مايو ناس أكتر هاتتكلم و خصوصا بعد حركة النصب بتاعة العلاوه ثم تعويض اضعاف اضعافها من جيوبنا برضه .. خلاص العجله دارت و محدش هايقدر يوقفها و المارد بدأ يصحى
و بعد 6 ابريل بقينا نسمع من الحكومه كلام عن وقف ارتفاع الاسعار و حد ادنى للأجور ..
كل ده كان كلام لإمتصاص غضب الشعب
و لزيادة النصب على الشعب المصرى الغلبان … اعلن الرئيس مبارك عن حيلة علاوة عيد العمال لضرب يوم 4 مايو
و بالفعل نجحت الحكومه و الحزب الوطنى فى افشال بعض الفاعليات يوم 4 مايو
و لما لقوا المصريين شربوا المقلب و فرحوا بالرشوه و كمان ما استجابوش لدعوة الاحتجاج و الضغط على الحكومه
فرحت الحكومه و قالت ياللا بقى نستغل دى فرصه
دا شعب طيب .. عمره ما هايعترض و لا هايضغط و لا هايحاسبنا
ياللا نزود حساباتنا فى بنوك سويسرا … و ممكن ناخد موضوع العلاوه دى حجه

لكن احنا يا شباب مش هانسيبهم ينصبوا على الشعب و يسرقوه
مش هانسمح بكده
احنا تحولنا لأكبر جماعة ضغط فى مصر
احنا مش حزب سياسى
ولا نسعى للسلطه

لكن احنا عايزين حقنا
حقنا اللى بيتسرق كل يوم و احنا ساكتين

مطالبنا لسه موجوده و لم يتم الاستجابه ليها
مطالبنا بسيطه جدا
1- حد ادنى للاجور لكل فئه مع ربط الاجور بالاسعار كما تفعل أى دوله تعانى من الغلاء …
2- إجراءات فوريه و صارمه و إصدار تشريعات و قوانين يتم تطبيقها على الجميع لمكافحة الغلاء و التحكم فى السوق و منع الإحتكار ..
3- الافراج عن معتقلى يوم 6 ابريل

و المطالب دى ممكن الحكومه تحلها بكل سهوله .. بس الأهم النيه مش مجرد تصريحات .. و فيه حلول كتير لزيادة الموارد زى الضرائب التصاعديه و التفعيل الحقيقى لرقابة الدوله و حماية المستهلك و تطبيق القوانين على الكل .. مش الغلابه بس
فيه عشرات الحلول اللى الناس المخلصين بيطالبوا بيها من زمان .. بس لازم حد يجبر صناع القرار فى مصر على التطبيق .. عمرهم ما هيدونا حقوقنا ولا هايحسوا بينا من نفسهم

‘طيب و بعد 4 مايو؟؟؟

الفكره اننا عايزين نعمل حمله كبيره
نعلن ان مطالبنا السابقه لم يتم اجابتها
و هى حد ادنى للاجور مع ربطها بالاسعار
و اجراءات فوريه و تطبيق التشريعات لمنع احتكار السلع الرئيسيه و وقف زيادة الاسعار
و تحقيق الاكتفاء الذاتى من الغذاء

الحمله هاتبدا بمؤتمر صحفى لممثلين لينا
و ننشر مطالبنا فى كل وسائل الاعلام
و نطالب بحل فورى للازمه التى ستؤدى لتدمير مصر و زيادة الفروق بين الطبقات و زعزعة الاستقرار .. حلوه زعزعة الاستقرارا دى

و هانرجع الجروب سخن تانى و هاننشر مطالبنا بكل الوسائل و ننشر لينكات الجروب فى كل حته فى النت

و هاندى فرصه اسبوع للحكومه للرد على المطالب المدعمه بحلول

طبعا هاينفضوا

ساعتها هايكون فيه تصعيد كبير
و حمله اكبر
و هانحدد معاد تانى للاحتجاج
بس هانخليها اكثر شعبيه
يعنى لازم كل الناس فى مصر يعرفوا مطالبنا .. و اكيد كله هايوافق عليها
و لازم كل الناس تكون معانا لإجبار الحكومه على تنفيذ المطالب

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: